បាងកក៖ ការប្រកួតពានរង្វាន់ AFF Championship ២០២២ ពូល A រវាងក្រុមម្ចាស់ផ្ទះជម្រើសជាតិថៃ ទល់នឹងក្រុមភ្ញៀវជម្រើសជាតិកម្ពុជា បានបញ្ចប់ជាផ្លូវការហើយ ដោយកម្ពុជា បានត្រឹមបរាជ័យទល់នឹងក្រុមម្ចាស់ផ្ទះថៃ ដោយលទ្ធផល ៣-១ នៅកីឡដ្ឋាន Thammsat ខេត្តផាធុម ថានី (Pathum Thani)។

ការប្រកួតនេះដឹក​នាំដោយអាជ្ញាកណ្តាលសញ្ជាតិអារ៉ាប់រួម លោក Omar Mohamed Al Ali។ នៅក្នុងវគ្គទី១ ស្ទើរតែគ្មានគ្រាប់បាល់កើតឡើងទៅហើយ ប៉ុន្តែនៅចុងម៉ោងនាទីទី៤៥ កំហុសពីខ្សែការពារកម្ពុជា បានបង្កើតឱ្យមានបាល់ពិន័យ​១១ម៉ែត្រ ធ្វើបានសម្រេចដោយកីឡាករ Teerasil Dangda នៅនាទីទី៤៥+២។ ចូលមកដល់វគ្គទី២ ម្ចាស់ផ្ទះរកបានមួយគ្រាប់ទៀតដើមវគ្គ​ដោយកីឡាករ Sumanya Purisai នៅនាទីទី៥០ ហើយ Teerasil Dangda ដដែលនេះបានបន្ថែមមួយគ្រាប់ទៀតនៅនាទីទី៩០ ខណៈកម្ពុជាតដៃវិញបានមួយគ្រាប់ដោយខ្សែប្រយុទ្ធក្លិបបឹងកេត សៀង ចន្ធា នៅនាទីទី៦៨។ 

លទ្ធផលនេះនាំឱ្យកម្ពុជា បានត្រឹមឈរលេខ ៣ ក្នុងពូល ឆ្លងកាត់ ២ប្រកួត ឈ្នះ ២ និងចាញ់ ២ ខណៈថៃ និងឥណ្ឌូណេស៊ី ដឹកដៃគ្នាឡើងទៅកាន់វគ្គបន្ត។ នៅថ្ងៃស្អែក ពីរក្រុមទៀតដែលឈានទៅវគ្គពាក់កណ្តាលផ្តាច់ព្រ័ត្រពាន AFF Championship ២០២២ នឹងរកឃើញ ពោលគឺក្រុមជម្រើសជាតិវៀតណាម នឹងត្រូវទទួលស្វាគមន៍ក្រុមជម្រើសជាតិមីយ៉ាន់ម៉ា នៅកីឡដ្ឋានជាតិ My Dinh ស្របពេលម៉ាឡេស៊ី ជួបជាមួយសិង្ហបុរី នៅកីឡដ្ឋានជាតិ Bukit Jalil៕